پشاور: وزیر اعظم عمران خان آج پشاور اور ضلع مہمند کا دورہ کریں گے، وزیر اعظم انڈر 21 گیمز کی افتتاحی تقریب میں مہمان خصوصی ہوں گے اور احساس کفالت پروگرام کا افتتاح کریں گے۔
تفصیلات کے مطابق آج وزیر اعظم خیبر پختون خوا میں احساس کفالت پروگرام کا افتتاح کریں گے، یہ پروگرام ابتدائی طور پر 4 اضلاع میں شروع کیا جائے گا، لکی مروت، مہمند، ہری پور اور چار سدہ میں احساس کفالت پروگرام کا آغاز آج ہوگا۔ اس پروگرام سے غریب اور متوسط طبقے کے خاندان مستفید ہوں گے۔
وزیر اعظم دورہ پشاور کے موقع پر انڈر 21 گیمز کی افتتاحی تقریب میں مہمان خصوصی کے طور پر شرکت کریں گے، افتتاحی تقریب کے بعد وزیر اعظم ضلع مہمند جائیں گے جہاں وہ احساس کفالت پروگرام کے تحت کارڈ تقسیم کریں گے، اور ایک جلسے سے خطاب بھی کریں گے۔
یہ بھی پڑھیں:پاک ایران سرحد 16 ویں روز بھی بند، افغان سرحد کی بندش میں ہفتے کی توسیع
کے پی کے مشیر اطلاعات اجمل وزیر نے میڈیا سے گفتگو کرتے ہوئے کہا قیوم اسپورٹس کمپلیکس میں میگا اسپورٹس ایونٹ آج سے شروع ہو رہا ہے، انڈر 21 گیمز کے لیے تیاریاں مکمل ہیں، 35 اضلاع سے 7 ہزار سے زائد کھلاڑی اس ایونٹ میں شرکت کریں گے۔
دریں اثنا، قیوم اسٹیڈیم میں کھلاڑیوں اور شہریوں کی آمد کا سلسلہ شروع ہو چکا ہے، سرکاری ذرایع کا کہنا ہے کہ اسٹیڈیم کے اطراف سخت سیکورٹی انتظامات کیے گئے ہیں۔
