اسلام آباد: اراکین پارلیمنٹ کی جانب سے تنخواہوں میں اضافے کے مطالبہ پر اسپیکر قومی اسمبلی کا رد عمل دیتے ہوئے کہا ہے یہ بل بالکل ہی غیر مناسب ہے۔
نمائندہ اے آر وائی نیوز عبدالقادر سے گفتگو کرتے ہوئے اسپیکر قومی اسمبلی اسد قیصر کا کہنا تھا کہ ملک ابھی معاشی بحران سے پوری طرح نہیں نکلا، اراکین کی تنخواہوں میں اضافے کے لیے یہ وقت مناسب نہیں ہے۔
اُن کا کہنا تھا کہ ملکی معیشت کو بہتر بنانے میں وقت لگے گا، وزیر اعظم پاکستان عمران کے وژن کے مطابق ملک کو معاشی بحران سے نکالنے کے لیے حکومت کفایت شعاری پر عمل پیرا ہے۔
اسد قیصر کا کہنا تھا کہ وزیر اعظم کی مربوط معاشی پالیسیوں کی بدولت ملک معاشی بحران سے آہستہ آہستہ باہر نکل رہا ہے، تنخواہوں میں اضافے سے ملکی خزانے پر بھاری بوجھ پڑے گا۔
یہ بھی پڑھیں:
وزیراعظم کا دورہ ملائیشیا کے لیے بھارتی فضائی حدود استعمال نہ کرنے کا فیصلہ
اُن کا مزید کہنا تھا کہ اراکین پارلیمنٹ کو چاہیے کہ وہ تنخواہوں میں اضافے کا مطالبہ تب کریں جب ملکی خزانہ اس بوجھ کو برداشت کرنے کے قابل ہوجائے۔
یاد رہے کہ اراکین سینیٹ اور قومی اسمبلی کی جانب سے بل لانے کی تیاری کی جارہی ہے جس میں انہوں نے بڑھتی مہنگائی کو بنیاد بنا کر اپنی تنخواہوں میں چار سو فیصد اضافے کا مطالبہ کریں گے۔
دوسری جانب تحریک انصاف اور پیپلزپارٹی نے بھی تنخواہوں میں اضافے کے مطالبے کو یکسر مسترد کردیا۔
