کراچی : پاکستان سول ایوی ایشن اتھارٹی نے ملازمین کی ترقی کارکردگی سےمشروط کردی اور ملازمین کی کارکردگی جانچنے کے لئے نیا حکم نامہ جاری کر دیا۔
حکم نامے میں کہا گیا کراچی سمیت ملک بھر کے آپریشنل ایئر پورٹس کے سروس گروپ 1 تا 4 کے ملازمین نیا پرفارمہ مکمل کریں گے جبکہ سروس گروپ ایک تا چار کے ملازمین کے ریکارڈ اور کارکردگی کو متعلقہ شعبوں کے جوائنٹ ڈائریکٹرز کی تصدیق سے مشروط کر دیا گیا ہے۔
حکم نامے کے مطابق ایس جی 01 سے 04 کے لئے رپورٹ نئےفارم سے منسلک کر دی گئی ہے، سی اے اے ملازمین کی کارکردگی چار جنوری 2019 تا 31 دسمبر 2019 تک نئے پرفارمہ میں مکمل کی جائے گی۔
مزید جانئیے:ایف اے ٹی ایف کے اعلان سے قبل چین کا پاکستان سے متعلق اہم بیان
حکم نامےمیں مزید کہا گیا سی اے اے ملازمین کی کارکردگی کی تصدیق جوائنٹ ڈائریکٹر سے کم نہیں افسر نہیں کر سکے گا۔
یاد رہے ملک کے اہم ترین ادارے سول ایوی ایشن اتھارٹی کو افسران کی کمی کا بدستور سامنا ہے ، سی اے اے میں بعض اعلیٰ عہدوں پر بھی عارضی طور پر افسران تعینات ہیں، جب کہ رواں سال 308 افسران اس ادارے سے ریٹائرڈ ہو جائیں گے۔
ذرایع کے مطابق سی اے اے کے 5 اہم شعبہ جات میں مستقل بنیادوں پر ڈائریکٹرز تعینات نہیں ہو سکے، ان میں کمرشل، ائیر پورٹس سروسز، آپریشن، سی این ایس اور ایچ آر کے محکمے شامل ہیں، جن میں عارضی بنیادوں پر افسران تعینات کیے گئے ہیں، اہم پوسٹ ڈائریکٹر آپریشن سی اے اے پر بھی قائم مقام آفیسر تعینات ہے، ایئر پورٹ پر ریڈار اور اہم تنصیبات کے شعبے کے ڈائریکٹر کمیونیکیشن نیوی گیشن سرویلنس کا عہدہ بھی کئی ماہ سے خالی ہے۔
