380

مخدوم پور: گھر میں سلنڈر پھٹنے سے 15 افراد جھلس گئے

مخدوم پور: پنجاب کے ضلع خانیوال کے قصبے مخدوم پور میں چک نمبر 10 میں گھر میں سلنڈر پھٹنے سے آگ لگ گئی۔

تفصیلات کے مطابق مخدوم پور کے ایک گھر میں آج صبح سلنڈر پھٹنے سے 15 افراد جھلس کر زخمی ہو گئے، ریسکیو ذرایع کا کہنا ہے کہ حادثے کے زخمیوں کو سول اسپتال منتقل کر دیا گیا ہے۔

یہ بھی پڑھیں:

چین میں پھنسے ہوئے پاکستانیوں کی واپسی کیلئے مناسب اقدامات کیے جائیں، عدالت

اطلاع ملتے ہی ریسکیو ٹیم موقع پر پہنچ گئی تھی، فائر فائٹرز نے گھر میں لگنے والی آگ کو فوری طور پر بجھایا۔ سلنڈر پھٹنے کا واقعہ ایک ایسے گھر میں پیش آیا جو مٹی کا بنا تھا، سلنڈر دھماکے سے گھر منہدم ہونے سے بچ گیا۔

یاد رہے کہ 8 فروری کو خیبر پختون خوا کے شہر کرک کے نواحی علاقے خڑے میں بھی گیس لیکیج دھماکے نے پورا گھر ڈھا دیا تھا، جس میں 6 افراد زخمی ہو گئے تھے، ملبے تلے آ کر زخمی ہونے والوں میں خواتین اور بچے بھی شامل تھے۔

خیال رہے کہ ملک بھر میں سردی میں شدید اضافے کے ساتھ ہی گیس لیکیج کے دھماکے بھی بڑھ گئے ہیں، سندھ، بلوچستان، پنجاب اور خیبر پختون خوا کے مختلف شہروں میں آئے روز گیس لیکیج سے دھماکوں کے واقعات رو نما ہو رہے ہیں، جن میں اب تک سیکڑوں افراد زخمی ہو چکے ہیں اور متعدد جان سے ہاتھ دھو بیٹھے ہیں۔

گزشتہ ماہ کے آغاز میں بھی خیبر پختون خوا کے شہر نوشہرہ کے علاقے امان گڑھ لیبر کالونی میں گھر میں گیس لیکیج کی وجہ سے دھماکا ہوا تھا جس میں خواتین اور بچوں سمیت 7 افراد جھلس کر زخمی ہو گئے تھے، زخمیوں کو نوشہرہ میڈیکل کمپلیکس منتقل کیا گیا تھا۔

اس خبر پر اپنی رائے کا اظہار کریں

اپنا تبصرہ بھیجیں