واشنگٹن : کرونا وائرس میں مبتلا 17 امریکی شہری جان کی بازی ہار گئے جبکہ 306 افراد میں ہلاکت خیز وائرس کی تصدیق ہوچکی ہے۔
تفصیلات کے مطابق چین سے پھیلنے والے مہلک ترین کرونا وائرس کے باعث دنیا بھر میں اموات کا سلسلہ جاری ہے، امریکا میں کرونا کے باعث اب تک ایک درجن سے زائد افراد موت کے گھاٹ اُتر چکے ہیں۔
امریکی میڈیا کی رپورٹ کے مطابق کیلیفورنیا، واشنگٹن اور فلوریڈا سمیت امریکا کی 15 سے ریاستوں میں کرونا وائرس کے اب تک 306 کیسز رپورٹ ہوچکے ہیں۔
فلوریڈا حکام نے تصدیق کی ہے کہ جمعے کے روز فلوریڈا کے علاقے ایسٹ کوسٹ میں بھی کرونا میں مبتلادو افراد کی موت واقع ہوگئی، حکام کا کہنا تھا کہ مرنے والے دونوں افراد نے ماضی میں بیرون ملک سفر کیا تھا۔
یہ بھی پڑھیں:کابل میں تقریب پر حملہ قابل مذمت ہے، شاہ محمود قریشی
امریکی ریاست ہوائی میں بھی کرونا کا پہلا کیسز رپورٹ ہوچکا ہے، متاثرہ شخص گرینڈ کروز شپ میں سوار تھا۔
امریکی خبر رساں ادارے کا کہنا ہے کہ گزشتہ گھنٹوں کے دوران امریکا میں کرونا وائرس کے 80 کیسز کی تصدیق ہوئی ہے، جس کے بعد متاثرہ افراد کی مجموعی تعداد 300 سے تجاوز کرگئی ہے۔
کانگریس نے امریکا میں کرونا وائرس پر قابو پانے کےلیے 8 ارب ڈالر کے فنڈز بھی جاری کرنے کا اعلان کردیا ہے۔
امریکی میڈیا کا کہنا ہے کہ کیلیفورنیا حکام نے ریاست میں کرونا وائرس کے باعث پہلے شخص کی ہلاکت کی تصدیق کردی ہے جس کے بعد ریاست بھر میں ایمرجنسی نافذ کردی گئی تھی دوسری جانب واشنگٹن میں 14 افراد ہلاکت ہوچکے ہیں۔
واضح رہے کہ دنیا بھر میں کرونا وائرس سے اموات کی تعداد 3250 ہوگئی ہے جبکہ 81 ممالک میں 95ہزار افراد وائرس کا شکار ہیں اور 53 ہزار سے زیادہ افراد صحت یاب ہوچکے ہیں۔
