155

لائیو شو میں سرفراز احمد کی تضحیک پرعدنان صدیقی تنقید کی زد میں

کراچی: عامر لیاقت کا مذاق برداشت نہ کرنے والے عدنان صدیقی نے لائیو شو میں سرفراز احمد کی تضحیک کرکے سوشل میڈیا صارفین کے غصے کو ہوا دے دی۔

پاکستان میں رمضان کی آمد کے ساتھ ہی مختلف رمضان اور گیم شوز کا ٹرینڈ چل پڑتا ہے اور شوز میں کئی بار کچھ ایسی حرکتیں ہوجاتی ہیں جو عوام کو سخت ناگوار گزرتی ہیں۔

چند روز قبل عامر لیاقت حسین نے اپنے شو جیوے پاکستان میں بھارتی اداکارہ سری دیوی اور عرفان خان کی موت کو لے کر عدنان صدیقی کے سامنے ایک مذاق کیا تھا جو عدنان صدیقی سے بالکل بھی برداشت نہیں ہوا تھااور انہوں نے سوشل میڈیا پر اپنے غصے کا اظہار کرتے ہوئے کہا تھا کہ انہیں عامر لیاقت کے شو میں جانے پر بے حد افسوس اور پچھتاوا ہے۔ بعد ازاں عامر لیاقت حسین نے اپنے مذاق پر معافی بھی مانگ لی تھی۔
تاہم اب عدنان صدیقی کی ایک ویڈیو کو سوشل میڈیا پر شدید تنقید کا نشانہ بنایاجارہا ہے جس میں وہ نجی ٹی وی چینل سے نشر ہونے والے پروگرام ’’جیتو پاکستان لیگ‘‘ میں سابق کپتان سرفراز احمد کی تضحیک کرتے ہوئے نظر آرہے ہیں۔

ویڈیو میں دیکھا جاسکتا ہے کہ سرفراز احمد شو کے دوران کچھ بول رہے ہیں اور شاید انہیں بولنے میں کچھ تکلیف ہے لیکن عدنان صدیقی درمیان سے ہی ان کی بات کاٹ کر ان کی نقل اتارنے لگتے ہیں۔ عدنان کی اس حرکت پر شو میں موجود دیگر افراد ہنسنے لگتے ہیں تاہم سوشل میڈیا صارفین کو عدنان صدیقی کی یہ حرکت بالکل پسند نہیں آئی اور انہوں نے عدنان صدیقی پر تنقید کرتے ہوئے کہا کہ کیا یہ وہی عدنان صدیقی ہیں جنہوں نے عامر لیاقت کے بے ہودہ مذاق کی مذمت کی تھی؟

مانی نامی صارف نے عدنان صدیقی کی اس حرکت کو مکروح اور شرمناک قرار دیتے ہوئے کہا کسی کے ساتھ اس طرح مذاق کرنا جائز ہے؟ کچھ احترام دکھائیں۔ خدا کے لیے یہ وہ کپتان ہیں جنہوں نے آپ کے لیے ٹرافی جیتی تھی۔

خدجہ نامی خاتون نے کہا عدنان صدیقی کی یہ حرکت بہت قابل نفرت ہے انہیں ہمارے کرکٹ ہیرو سے معافی مانگنی چاہئے۔

طارق حمید نے کہا عدنان بھائی سرفراز احمد کے ساتھ یہ پیدائشی مسئلہ ہے اگر آپ کے ساتھ یہ مسئلہ نہیں ہے تو آپ کو خڈا کا شکر ادا کرنا چاہیے نہ کہ دوسروں کا مذاق اڑانا چاہئے۔

رومیو نامی شخص نے عدنان صدیقی کو نیشنل ٹی وی پر سب کے سامنے سرفراز کا مذاق اڑانے اور ان کی تضحیک کرنے پر بہت برا بھلا کہا۔

اسامہ نامی صارف نے کہا جس طرح انہوں نے پہلے انسٹاگرام پر سری دیوی اور عرفان خان کے معاملے پر لمبی چوڑی تقریر کے ذریعے مذمت کی تھی اب ہم اسی طرح ان کے معافی کے منتظر ہیں۔

اس خبر پر اپنی رائے کا اظہار کریں

اپنا تبصرہ بھیجیں