پشاور: وزیراعلیٰ خیبرپختونخوا محمود خان نے کرپشن میں ملوث عناصر کو برخاست کرنے کی ہدایت کر دی۔
تفصیلات کے مطابق وزیراعلیٰ خیبرپختونخوا محمودخان کی زیرصدارت انتظامی سیکریٹریز کا اجلاس ہوا جس میں انہوں نے تمام وزرا کو شارٹ، میڈیم اور طویل مدت پلان تشکیل کرنے کی ہدایت کرتے ہوئے کہا کہ کرپشن میں ملوث عناصر کو برخاست کیا جائے۔
محمود خان نے کہا کہ اہم عہدوں پر قابل افسران کام کریں گے، کام نہ کرنے والوں کو فارغ کیا جائے گا، کرپشن کے خاتمے سے متعلق ہدایت پر ہر صورت عمل ہوگا۔
یہ بھی پڑھیں:
وزیراعظم عمران خان کی زیرصدارت وفاقی کابینہ کا اجلاس جاری ، اہم اور بڑے فیصلےمتوقع
وزیراعلیٰ خیبرپختونخوا نے محکموں کو کمیونیکشن اسٹریٹجی بنانے اور سی اینڈ ڈبلیو کو کمیشن کے خاتمے کے لیے ہنگامی اقدامات کی ہدایت کر دی۔ انہوں نے کہا کہ تمام محکمے ڈیجٹلائزیشن پر خصوصی توجہ دیں۔
محمود خان نے قبائلی اضلاع سمیت صوبہ بھر میں خالی آسامیاں پُر کرنے کی ہدایت کرتے ہوئے کہا کہ قبائلی اضلاع میں ترقیاتی منصوبے حکومت کی ترجیح ہے۔
انہوں نے کہا کہ تمام قوانین کی لیے ہنگامی بنیادوں پر رولز بنائے جائیں، ہمارا کام پالیسی وضع کرنا اور عملدرآمد انتظامیہ کی ذمہ داری ہے، حکومتی امور میں میرٹ، شفافیت یقینی بنانا ہمارا مقصد ہے۔ وزیراعلیٰ خیبرپختونخوا نے کہا کہ عوام نے دوسری بار کامیاب کیا، ہر صورت توقعات پر پورا اترنا ہے۔
