راولپنڈی: بھارتی فوج کی ایل او سی پر اشتعال انگیزیوں کا سلسلہ جاری ہے، بھارتی فوج کی فائرنگ سے 2 خواتین، 2 بچوں سمیت 10 شہری زخمی ہوگئے، پاک فوج کی جوابی کارروائی میں بھارتی فوجی ہلاک ہوگیا۔
پاک فوج کے شعبہ تعلقات عامہ (آئی ایس پی آر) کے مطابق بھارتی فوج نے جندروٹ، نکیال سیکٹر پر بھاری ہتھیار استعمال کیے جس کے نتیجے میں 2 خواتین، 2 بچوں سمیت 10 شہری زخمی ہوگئے۔
آئی ایس پی آر کے مطابق زخمی شہریوں کو علاج کے لیے قریبی طبی مرکز منتقل کردیا گیا۔
آئی ایس پی آر کے مطابق پاک فوج کی بھرپور جوابی کارروائی کے نتیجے میں ایک بھارتی فوجی ہلاک اور بھارتی فوج کے میجر سمیت 3 اہلکار زخمی بھی ہوئے۔
آئی ایس پی آر کے مطابق پاک فوج کی جوابی کارروائی میں بھارتی چیک پوسٹوں کو نقصان پہنچا۔
یہ بھی پڑھیں:
علی محمد خان نے سرعام پھانسی پر ریفرنڈم کروانے کی تجویز دیدی
واضح رہے کہ 4 فروری کو بھارتی فورسز نے لیپا ویلی میں ایل او سی پر شہری آبادی کو مارٹر گولوں سے نشانہ بنایا تھا جس کے نتیجے میں 2 خواتین اور بچے سمیت 4 شہری زخمی ہوگئے تھے۔
ترجمان دفتر خارجہ کی جانب سے بھارتی سینئر سفارت کار کو دفتر خارجہ طلب کرکے سیز فائر کی خلاف ورزی پر احتجاج ریکارڈ کرایا گیا تھا۔
ترجمان دفتر خارجہ کا کہنا تھا کہ پاکستان شہری آبادی کو نشانہ بنانے کی شدید مذمت کرتا ہے، بھارت 2003 کے فائر بندی معاہدے کا احترام کرے۔
